點解通德同學仔會覺得浩瀚的宇宙彷彿觸手可及呢？
因為我哋顛覆傳統課堂嘅時鐘，重新定義學習嘅邊界，舉辦 「親子星空嘉年華」，師生家長一齊「顛倒日夜」，喺晚風中打開咗通往星海嘅課堂。
今次「返夜校」，唔只係為咗仰望星空，更是為咗讓朋友跳出課本知識嘅局限，將望遠鏡交到小朋友手中，讓佢哋用雙眼親眼見證、用雙手親手操作，感受宇宙真實嘅脈動，將夜空變成無邊嘅教室。
動手見真章：從一串魚蛋到土星環
小朋友同家長喺天文望遠鏡中，親眼睇到木星嘅紋路、土星嘅光環、天狼星嘅璀璨，甚至 M33 星群嘅朦朧光影。有同學驚喜大喊：「原來土星好似一串魚蛋！」
嗰一刻，科學唔再遙遠。教科書上抽象嘅天文知識，經望遠鏡放大千百倍後，化成眼前趣味盎然嘅畫面 —大家見證到知識喺孩子眼中發光，好奇心喺小朋友心裏萌芽。
「軟」「硬」兼施，學思並進
當晚，同學不但用天文望遠鏡等「硬件」，更結合 Stellarium、Seestar 等星空「軟件」，教孩子如何追蹤星軌、辨識星座。喺科技同工具嘅交織中，小朋友唔再係被動嘅觀星者，更成為主動嘅宇宙探險家。
今次活動，我哋選擇踏上一條不一樣嘅學習：將框架拆走，將星空帶進教育，將學習交還給最真實嘅體驗。
星空好高，但孩子嘅夢想同求知慾永遠可以更高。真正嘅學習，從來唔局限於課室四壁，佢喺每顆發問嘅心裡，喺每次抬頭嘅瞬間，喺每個親子並肩凝望星海嘅夜晚。今晚最珍貴嘅，雖然唔係若干年後學子希望摘到嘅，卻是此時此地，我哋一齊轉動鏡筒，為彼此摘下整片穹蒼嘅星光。